དྲི་བ། ཐེག་ཆེན་སེམས་བསྐྱེད་ཀྱི་ངོ་བོ་གང་ཡིན་ནམ།
ལན། རང་གི་གྲོགས་སུ་གྱུར་པའི་གཞན་དོན་དུ་རྫོགས་བྱང་ལ་དམིགས་པའི་འདོད་པ་དང་མཚུངས་ལྡན་དུ་བྱུང་བའི་ཐེག་ཆེན་ལམ་གྱི་འཇུག་སྒོ་གྱུར་པའི་གཙོ་བོ་ཡིད་ཀྱི་རྣམ་རིག་དེ་ཡིན།
དྲི་བ། ཐེག་ཆེན་སེམས་བསྐྱེད་ལ་ཡིན་ཚུལ་གྱི་སྒོ་ནས་དབྱེ་ན་གཉིས་དེ་གང་དག་ཡིན་ནམ།
ལན། སྨོན་པ་བྱང་ཆུབ་ཀྱི་སེམས་དང༌། འཇུག་པ་བྱང་ཆུབ་ཀྱི་སེམས་གཉིས་ཡོད།
དྲི་བ། སྨོན་པ་བྱང་ཆུབ་ཀྱི་སེམས་ཀྱི་ངོ་བོ་གང་ཡིན་ནམ།
ལན། སྤྱོད་པ་ཉམས་ལེད་ཀྱི་བྱ་བའི་དངོས་སུ་མ་ཟིན་པའི་ཐེག་ཆེན་ལམ་གྱི་འཇུག་སྒོར་གྱུར་པའི་གཙོ་བོ་ཡིད་ཀྱི་
རྣམ་རིག་དེ་དེའི་ངོ་བོ་ཡིན།
དྲི་བ། འཇུག་པ་བྱང་ཆུབ་ཀྱི་སེམས་ཀྱི་ངོ་བོ་གང་ཡིན་ནམ།
ལན། སྤྱོད་པ་ཉམས་ལེད་ཀྱི་བྱ་བའི་དངོས་སུ་ཟིན་པའི་ཐེག་ཆེན་ལམ་གྱི་འཇུག་སྒོར་གྱུར་པའི་གཙོ་བོ་ཡིད་ཀྱི་རྣམ་རིག་དེ་དེའི་ངོ་བོ་ཡིན།
དྲི་བ། ཐེག་ཆེན་སེམས་བསྐྱེད་ལ་སྒྲས་བརྗོད་རིགས་ཀྱི་སྒོ་ནས་དབྱེ་ན་གཉིས་དེ་གང་ཡིན་ནམ།
ལན། ཀུན་རྫོབ་བྱང་ཆུབ་ཀྱི་སེམས་དང༌། དོན་དམ་བྱང་ཆུབ་ཀྱི་སེམས་གཉིས་ཡོད།
དྲི་བ། དོན་དམ་བྱང་ཆུབ་ཀྱི་སེམས་ཀྱི་ངོ་བོ་གང་ཡིན་ནམ།
ལན། རྫོགས་པའི་བྱང་ཆུབ་ཀྱི་གནས་ལུགས་ལ་གཉིས་སྣང་ནུབ་ཅིང་ཐེག་ཆེན་གྱི་ཤེས་རབ་ཀྱི་རྟོགས་རིགས་སུ་གནས་པའི་ཐེག་ཆེན་འཕགས་པའི་རྒྱུད་ཀྱི་གཙོ་བོ་ཡིད་ཀྱི་རྣམ་རིག་དེ་ཡིན། འདི་ནི་བྱང་ཆུབ་ཀྱི་སེམས་དངོས་གནས་པ་མིན་པ་སྒྲས་བཏགས་པ་ཙམ་རེད
དྲི་བ། ས་མཚམས་ཀྱི་སྒོ་ནས་དབྱེ་ན་སེམས་བསྐྱེད་ལ་བཞི་དེ་གང་དག་ཡིན་ནམ།
ལན། མོས་པ་སེམས་བསྐྱེད།། ལྷག་བསམ་དག་པའི་སེམས་བསྐྱེད། རྣམ་པ་སྨིན་པའི་སེམས་བསྐྱེད། སྒྲིབ་པ་སྤངས་པའི་སེམས་བསྐྱེད་དང་བཞི་ཡོད།
དྲི་བ། དགོས་ཆེད་ཀྱི་སྒོ་ནས་དབྱེ་ན་སེམས་བསྐྱེད་ལ་གསུམ་དེ་གང་དག་ཡིན་ནམ།
ལན། ཕྱུག་རྫི་ལྟ་བུའི་སེམས་བསྐྱེད། མཉན་པ་ལྟ་བུའི་སེམས་བསྐྱེད། རྒྱལ་པོ་ལྟ་བུའི་སེམས་བསྐྱེད་དང་གསུམ་ཡོད།
དྲི་བ། སེམས་བསྐྱེད་སྐྱེ་བའི་རྒྱུ་བཞི་དེ་གང་དག་ཡིན་ནམ།
ལན། ཐེག་ཆེན་དུ་རིགས་སད་པའི་རྒྱུ། དགེ་བའི་བཤེས་གཉེན་གྱིས་ཟིན་པའི་རྒྱུ། བརྩེ་བ་སྙིང་རྗེ་ཆེན་པོས་ཟིན་པའི་རྒྱུ། གཞན་གྱི་དཀའ་སྤྱད་ལ་བཟོད་པའི་རྒྱུ་དང་བཞི་ཡོད།
དྲི་བ། སེམས་བསྐྱེད་སྐྱེ་བའི་རྐྱེན་བཞི་དེ་གང་དག་ཡིན་ནམ།
ལན། བྱང་སེམས་ཀྱི་མཐུ་བསམ་གྱི་མི་ཁྱབ་མཐོང་བའི་རྐྱེན༌། བྱང་སེམས་ཀྱི་སྡེ་སྣོད་མང་དུ་ཐོས་པའི་རྐྱེན། ཐེག་ཆེན་
གྱི་བསྟན་པ་ཉམས་པ་མ་བཟོད་པའི་རྐྱེན། སྙིང་མའི་དུས་འདིར་སེམས་བསྐྱེད་དཀོན་པར་མཐོང་བའི་རྐྱེན་དང་བཞི་ཡོད།
དྲི་བ། སེམས་བསྐྱེད་སྐྱེ་བའི་སྟོབས་བཞི་དེ་གང་དག་ཡིན་ནམ།
ལན། རང་གི་སྟོབས། གཞན་གྱི་སྟོབས། སྒོམ་པའི་སྟོབས། སྦྱོར་བའི་སྟོབས་དང་བཞི་ཡོད།
དྲི་བ། རང་གི་སྟོབས་ལས་སེམས་བསྐྱེད་སྐྱེ་བའི་དོན་གང་ཡིན་ནམ།
ལན། གཞན་སྡུག་བསྔལ་བ་ལ་མ་ལྟོས་པར་རང་སྟོབས་ཀྱིས་སེམས་བསྐྱེད་སྐྱེ་བ་ཞིག་ལ་ཟེར།
དྲི་བ། གཞན་གྱི་སྟོབས་ལས་སྐྱེ་བའི་དོན་གང་ཡིན་ནམ།
ལན། གཞན་སྡུག་བསྔལ་བ་ལ་ལྟོས་པའི་སྟོབས་ཀྱིས་སེམས་བསྐྱེད་སྐྱེ་བ་ལ་ཟེར།
དྲི་བ། སྒོམ་པའི་སྟོབས་ལས་སྐྱེ་བའི་དོན་གང་ཡིན་ནམ།
ལན། ཚེ་རབས་སྔ་མར་སེམས་བསྐྱེད་གོམས་པའི་མཐུས་སེམས་བསྐྱེད་གསར་དུ་སྐྱེ་བ་ལ་ཟེར།
དྲི་བ། སྦྱོར་བའི་སྟོབས་ལས་སྐྱེ་བའི་དོན་གང་ཡིན་ནམ།
ལན། སྦྱོར་བ་ཐེག་ཆེན་གྱི་དགེ་བའི་བཤེས་གཉེན་གྱི་དྲིན་གྱིས་སེམས་བསྐྱེད་སྐྱེ་བ་ལ་ཟེར།
དྲི་བ། ཐེག་ཆེན་སེམས་བསྐྱེད་ཀྱི་རྒྱུའི་གཙོ་བོ་གཉིས་དེ་གང་དག་ཡིན་ནམ།
ལན། རྒྱལ་བ་བྱམས་པ་ནས་བརྒྱུད་པའི་ལུགས་ཀྱི་རྒྱུ་འབྲས་མང་ངག་བདུན་མ་དང༌། རྗེ་བཙུན་འཇམ་དབྱངས་ནས་བརྒྱུད་པའི་ལུགས་ཀྱི་བདག་གཞན་བརྗེ་བའི་བསམ་པ་གཉིས་ཡིན།
དྲི་བ། རྒྱུ་འབྲས་མན་ངག་བདུན་དེ་གང་དག་ཡིན་ནམ།
ལན། མ་ཤེས་པ། དྲིན་དྲན་པ། དྲིན་བཟོ་བ། ཡིད་འོང་གི་བྱམས་པ། སྙིང་རྗེ། ལྷག་བསམ། སེམས་བསྐྱེད་དང་བདུན་ཡིན།
དྲི་བ། བདག་གཞན་བརྗེ་བའི་བསམ་པ་སྐྱེ་ཚུལ་དེ་གང་ཡིན་ནམ།
ལན། རང་ཉིད་གཅེས་པར་འཛིན་པའི་བློ་དང་གཞན་ཡལ་བ་དོར་བའི་བླཽ་གཉིས་གོ་ས་བརྗེ་སྟེ། རང་གཅེས་འཛིན་གྱི་
བློ་དེ་ཕར་དོར་ནས་གཞན་གཅེས་པ་འཛིན་པ་དང༌། གཞན་ཡལ་བ་འདོར་བའི་སེམས་དེ་ཕར་དོར་ནས་རང་ཉིད་ཡལ་བ་འདོར་ཐུབ་པའི་བློ་ཁྱད་པར་ཅན་ཞིག་ལ་ཟེར།
དྲི་བ། བྱང་ཆུབ་ཏུ་སེམས་བསྐྱེད་པའི་ཕན་ཡོན་གང་ཡོད་དམ།
ལན། སྡིག་པ་འདག་པ། ངན་སོང་གི་སྐྱེ་བ་བཅད་པ། བདེ་གཤེགས་སྲས་པའི་བསྔགས་པ་ཐོབ་པ། འཇིག་རྟེན་ལྷ་དང་བཅས་པའི་ཕྱག་བྱ་བའི་འོས་སུ་འགྱུར་པ། མཐར་ཐུག་སངས་རྒྱས་ཐོབ་པ་སོགས་ཀྱི་ཕན་ཡོན་ཡོད།
དྲི་བ། ཕར་ཕྱིན་དྲུག་དེ་གང་དག་ཡིན་ནམ།
ལན། སྦྱིན་པ། ཚུལ་ཁྲིམས། བཟོད་པ། བརྩོན་འགྲུས། བསམ་གཏན། ཤེས་རབ་ཀྱི་ཕར་ཕྱིན་དང་དྲུག་ཡིན།
དྲི་བ། ཕར་ཕྱིན་གྱི་སྒྲ་དོན་གང་ཡིན་ནམ།
ལན། སྲིད་པ་འཁོར་བའི་ཕར་རོལ་ཏུ་ཕྱིན་པས་ན་ཕར་ཕྱིན་ཞེས་ཟེར།
དྲི་བ། སྦྱིན་པའི་ཕར་ཕྱིན་གྱི་ཉམས་ལེན་ཟེར་ན་གང་ཞིག་ལ་ཟེར།
ལན། སྦྱིན་པའི་ཕར་ཕྱིན་གྱི་ཉམས་ལེན་ནི་གཏོང་བའི་སེམས་པ་སྤེལ་བའི་བློ་ཞིག་ལ་ཟེར།
དྲི་བ། སྦྱིན་པ་ལ་ག་ཚོད་ཡོད་དམ།
ལན། ཟང་ཟིང་གི་སྦྱིན། ཆོས་ཀྱི་སྦྱིན་པ། མི་འཇིགས་པའི་སྦྱིན་པ། བྱམས་པའི་སྦྱིན་པ་དང་བཞི་ཡོད།
དྲི་བ། ཟང་ཟིང་གི་སྦྱིན་པ་ཟེར་ན་གང་ཞིག་ལ་ཟེར།
ལན། སེམས་ཅན་གཞན་ལ་དགོས་མཁོའི་ཅ་དངོས་རིགས་སྤྲོད་པ་ལ་ཟེར།
དྲི་བ། ཆོས་ཀྱི་སྦྱིན་པ་ཟེར་ན་གང་ཞིག་ལ་ཟེར།
ལན། སེམས་ཅན་གཞན་ལ་ལས་དགེ་སྡིག་གི་བླང་དོར་ལམ་སྟོན་བྱེད་པ་སོགས་ལ་ཟེར།
དྲི་བ། མི་འཇིགས་པའི་སྦྱིན་པ་ཟེར་ན་གང་ཞིག་ལ་ཟེར།
ལན། སེམས་ཅན་མེས་ཚིག་པ་དང་ཆུའི་འཁྱེར་བ་སོགས་ལས་སྐྱོབ་རོགས་བྱེད་པར་ཟེར།
དྲི་བ། བྱམས་པའི་སྦྱིན་པ་ཟེར་ན་གང་ཞིག་ལ་ཟེར།
ལན། སེམས་ཅན་གཞན་གྱི་བདེ་བའི་དོན་དུ་ཕན་གྲོགས་བྱེད་པའི་བརྩེ་སེམས་ཁྱད་པར་ཅན་ཞིག་ལ་ཟེར།
དྲི་བ། སྦྱིན་པའི་འབྲས་བུ་དེ་གང་ཡིན་ནམ།
ལན། ཚེ་འདིར་དང་ཕྱི་མ་གཉིས་ཀ་ལ་རྒྱུ་ནོར་ལོངས་སྤྱོད་འཕེལ་བ་དང༌། བསོད་ནམས་ཀྱི་ཚོགས་རྒྱ་ཆེན་གསོག་པ་སོགས་ཀྱི་ཕན་འབྲས་མང་པོ་ཡོད།
དྲི་བ། ཚུལ་ཁྲིམས་ཀྱི་ཕར་ཕྱིན་གྱི་ཉམས་ལེན་དེ་གང་ཡིན་ནམ།
ལན། རང་གི་སྒོ་གསུམ་ཉེས་པའི་སྤྱོད་པ་ལ་འཇུག་པ་སྲུང་བའི་སེམས་པ་དེ་ཡིན།
དྲི་བ། ཚུལ་ཁྲིམས་ལ་དབྱེ་ན་ག་ཚོད་ཡོད་དམ།
ལན། སོ་ཐར་གྱི་ཚུལ་ཁྲིམས། བྱང་སེམས་ཀྱི་ཚུལ་ཁྲིམས། གསང་བསྔགས་ཀྱི་ཚུལ་ཁྲིམས་དང་གསུམ་ཡོད།
དྲི་བ། སྡོམ་པ་ལ་དབྱེ་ན་ག་ཚོད་ཡོད་དམ།
ལན། སོ་ཐར་གྱི་སྡོམ་པ། བྱང་སེམས་ཀྱི་སྡོམ་པ། གསང་བསྔགས་ཀྱི་སྡོམ་པ་དང་གསུམ་ཡོད།
དྲི་བ། བཟོད་པའི་ཕར་ཕྱིན་གྱི་ཉམས་ལེན་ཟེར་ན་གང་ཞིག་ལ་ཟེར།
ལན། ཇི་ལྟ་བཟོད་པ་དཀའ་བའི་གནོད་འཚེ་སོགས་བྱ་དཀའ་བའི་རིགས་གང་འབྱུང་ཡང་སེམས་སྐད་ཅིག་ཀྱང་མི་འཁྲུག་པའི་བློ་ཞིག་ལ་ཟེར།
དྲི་བ། བཟོད་པ་ལ་དབྱེ་ན་ག་ཚོད་ཡོད་དམ།
ལན། གནོད་བྱེད་ལ་ཇི་མི་སྙམ་པའི་བཟོད་པ། སྡུག་བསྔལ་དང་ལེན་གྱི་བཟོད་པ། ཆོས་ལ་ངེས་ཤེས་ཀྱི་བཟོད་པ་གསུམ་ཡོད།
དྲི་བ། བཟོད་པའི་འབྲས་བུ་དེ་གང་ཡིན་ནམ།
ལན། གཟུགས་མཛེས་ཤིང་ཡིད་དུ་འོང་བ། སེམས་ཅན་གཞན་ལ་སྣང་བ་མི་འགྲོ་བ་མེད་པ། གྲོགས་བཟང་པོ་རྙེད་པ་སོགས་ཀྱི་ཕན་ཡོན་ཡོད།
དྲི་བ། བརྩོན་འགྲུས་ཀྱི་ཕར་ཕྱིན་གྱི་ཉམས་ལེན་གྱི་དོན་གང་ཡིན་ནམ།
ལན། སེམས་དགེ་བ་ལ་མངོན་པ་སྤྲོ་བའི་སེམས་བྱུང་དེ་ཡིན།
དྲི་བ། བརྩོན་འགྲུས་ལ་དབྱེ་ན་ག་ཚོད་ཡོད་དམ།
ལན། གོ་ཆའི་བརྩོན་འགྲུས། སྦྱོར་བའི་བརྩོན་འགྲུས་གཉིས་ཡོད
དྲི་བ། ལེ་ལོ་ལ་དབྱེ་ན་ག་ཚོད་ཡོད་དམ།
ལན། ཕྱི་ཤོས་ཀྱི་ལེ་ལོ། བྱ་བ་ངན་ཞེན་གྱི་ལེ་ལོ། སྒྱིད་ལུག་གི་ལེ་ལོ་དང་གསུམ་ཡོད།
དྲི་བ། བསམ་གཏན་གྱི་ཕར་ཕྱིན་གྱི་ཉམས་ལེན་གྱི་དོན་གང་ཡིན་ནམ།
ལན། སེམས་དགེ་བའི་ཆོས་ལ་རྩེ་གཅིག་ཏུ་གནས་པའི་བློ།
དྲི་བ། ཤེས་རབ་ཀྱི་ཕར་ཕྱིན་གྱི་ཉམས་ལེན་གྱི་དོན་གང་ཡིན་ནམ།
ལན། ཆོས་ཀྱི་གནས་ལུགས་ལ་དཔྱད་པར་བྱེད་པའི་ཡིད་ཤེས་དེ་ཡིན།
དྲི་བ། ཤེས་རབ་ལ་དབྱེ་ན་ག་ཚོད་ཡོད་དམ།
ལན། དོན་དམ་རྟོགས་པའི་ཤེས་རབ་དང༌། ཀུན་རྫོབ་རྟོགས་པའི་ཤེས་རབ་གཉིས་ཡོད།
དྲི་བ། དོན་དམ་རྟོགས་པའི་ཤེས་རབ་ཟེར་ན་གང་ཞིག་ལ་ཟེར
ལན། ཆོས་ཀྱི་གནས་ལུགས་མཐར་ཐུག་དེ་ཁོ་ན་ཉིད་རྟོགས་པའི་ཤེས་རབ་ལ་ཟེར།
དྲི་བ། ཀུན་རྫོབ་རྟོགས་པའི་ཤེས་རབ་ཟེར་ན་གང་ཞིག་ལ་ཟེར།
ལན། བླང་དོར་གྱི་གནས་ཇི་བཞིན་རྟོགས་པའི་ཤེས་རབ་ལྟ་བུ་ལ་ཟེར།
དྲི་བ། ཐེག་ཆེན་པ་ཟེར་ན་གང་ཞིག་ལ་ཟེར།
ལན། བྱང་ཆུབ་ཀྱི་སེམས་རང་བརྒྱུད་ལ་མངོན་གྱུར་པའམ་མ་ཉམས་པའི་ཚུལ་དུ་ལྡན་པའི་གང་ཟག་ཞིག་ལ་ཟེར།
0 མཆན།:
Post a Comment
Click to see the code!
To insert emoticon you must added at least one space before the code.